الثلاثاء، 30 ديسمبر، 2008

الى جهاز مباحث امن الدوله .. نشكركم على عدم تعاونكم معنا

الى العميد احمد السيد من جهاز مباحث امن الدوله- سواء كان ده اسمك الحقيقى او الحركىفى اتصالاتك بيا كان اسلوبك بصراحه غايه فى الادب و التهذيب.. و ده وقف تشغيل اسطوانة الردود البايخه اللى بتنتهى باغلاق الخط .. و الاسطوانه دى بتشتغل توماتيكى لما ظباط امن الدوله بيتصلوا.. لكن اسلوبك المهذب خلانى أرد ردود مهذبه.اما بالنسبه لمحتوى المكالمه و هو طلب اتكرر قبل كده انى اجيلكم ندردش و نتناقش و نتفاهم الى اخره
الطلب ده اتكرر قبل كده بعد اضراب 6 ابريل 2008 و طبعا نفضت و اختفيت شويه و لما ظهرت لقيتكم مستنيين و حصل اللى حصل و شوفنا قرصة الودن بتبقى عامله ازاى.
المره دى برضه يؤسفنى انى اقولك انى هانفض برضه رغم انى محتاج الكاميرا بتاعتى اللى عندكم و مش عارف اطلع بطاقه ولا رخصه بدل اللى اخدتوها.انت حاولت تقنعنى فى المكالمه زى ما حاولوا يقنعونى عندكوا قبل كده لما روحت بالعافيه فى مايو 2008 اننا ممكن نتعاون و ممكن نبقى اصحاب و ساعتها هاتبقى الدنيا زى الفل و هانريح بعض و كمان فوق كده هتنهال عليا الجوائز و المباركات و حتى التليفزيون الارضى زى رفعت السعيد و شغل بدل اللى ضاع بقى و كل حاجهو ساعتها طلعت غبى من وجهة نظركم و من وجهة نظر بعض السياسيين الكبار و رفضت عرضكم.
و بكرر الرفض لاسباب كتير منها على سبيل المثال لا الحصر
* انا بالتأكيد مش مقتنع ان جهاز امن الدوله جهاز وطنى بيحمى مصر لانه هو الجهاز اللى بيحمى الفاسدين و بيساعد الحزب الوطنى فى تزوير الانتخابات و هو الجهاز اللى بيعتقل الناس بدون ذنب او ادنى احساس بالمسئوليه
ظباط امن الدوله ممكن يحبسوا واحد لمدة شهر او اتنين او اكتر لاسباب تافهه و عمرهم ما يفكروا فى الشخص المعتقل هل ليه عيال .. هل اترفد من شغله ..
ظباط امن الدوله مابيفرقوش بين المحترم و غير المحترم ..
اهم حاجه تنفيذ الاوامر اللى بتصدر من الؤساء و اللى بتصدر من قيادات الدوله
كل واحد همه مصلحته و كل واحد همه يحافظ على كرسيه
هل اللى عملتوه فى المحله من عنف جنونى ادى لتفاقم الازمه كان لصالح مصر؟؟
طيب هل تعذيبى عندكوا فى شهر مايو كان لصالح مصر؟؟
طيب هل اعتقالاتنا فى 23 يوليو لما كانا بنغنى كان لصالح مصر؟؟
طيب هل اعتقال محمد عادل هاينقذ مصر؟؟
هل اعتقال نور و احمد اشرف و شوقى و رامى لصالح مصر؟؟
أشك طبعا
• بالتاكيد جهاز امن الدوله عارف و متاكد اننا مختلفين عن الحركات السابقه و الحاليه
• احنا مالناش مصلحه غير اصلاح مصر
• لا نبسعى للسلطه ولا بنقبض على شغلنا
• بالتاكيد مختلفين عن شخصيات سياسيه ليها اسمها و شهرتها بتجعجع فى الفضائيات و الصحف و عاملين نفسهم مناضلين و هما شغالين بالتنسيق و اوامر منكم
منهم صحفيين كبار و منهم رؤساء احزاب...
بالتأكيد مختلفين عن ناس كبار و صغيرين بيناضلوا الصبح و يبلغوكم بالليل.. و الغريبه ان ضميرهم مرتاح
• بالتأكيد مختلفين عن مناضلين المراكز اللى قبل اى خطوه او نشاط بيسألوا بكام
العميد احمد السيد .. احنا غير الباقيين.. و لو انتوا بجد بتحموا مصر زى ما بتقولوا .. اثبتوا كده باعتقال اللصوص الكبار و تقديمهم للمحاكمه
لو انتوا بجد بيبقى هدفكم هو تامين الشوارع و الممتلكات يبقى لما تسمعوا اننا هانعمل حاجه تنفذوا وظيفتكم بحماية المنشئات و الممتلكات فقط .. مش تضييق و منع و ضرب و اعتقالات و اهانه و ارهاب
العميد احمد السيد .. ماينفعش ناخد اوامر منكم ... و لو فيه شوية اطفال صغيرين مننا بيسمعوا كلامكم و اوامركم بالتبليغ قبل او بعد الانشطه او باثارة المشاكل و تكوين التكتلات و الانشقاقات لاى سبب.. بالتاكيد هايندموا
لما ظابط امن دوله يطلب التعاون مع واحد معارض بيبقى بالظبط زى واحد طمعان فى واحده و عايزها و نيته ليها مش حلوهو يقعد كل يوم يقولها ماتيجى نتقابل فى السريع يا بت
انا نيتى خير و مش هالمسك صدقينى و محدش هايعرف.. اشوفك بس
و لو هى قالت لنفسها ايه يعنى .. اقابله بس فى الشارع و مش هايلمسنى و محدش هايعرف
و مع تكرار المقابلات و تنوع العروض و تسهيلها.. يقنعها انهم ممكن ياخدوا كام بوسه خفيفه عنده فى الشقه و تنزل على طول.. مش هى واثقه فيه .. مش هو اللى بيحميها
و لما تروح عنده و يعمل كل اللى هو عايزه .. يبقى خلاص كل لما يقولها تعالى مش هاتعرف ترفض
--------------------------------------------------------------
يا ريت الناس اللى معانا و اتضحك عليهم و بقوا فرحانين ان معاهم رقم هشام بيه او عمرو بيه او غيرهم يفكروا فى الكلام ده كويس
شويه بشويه هيلاقوا نفسهم بيتورطوا من غير ما يشعروا...
شوية خدمات و بعدها طلبات و فجاه هتلاقى نفسك عصفوره من غير ما تحس...
و ساعتها مش هاتقدر ترفض
----------------------------------------
هى الحكايه بتيجى كده ..
الظابط الامور يدخل الدخله المعتاده
انا اخوك الكبيرو المعارضه مش عيب
احنا ممكن نبقى صحاب و لو وقعت فى اى مشكله بلغنا
مش عايزين منك حاجه خالص صدقنى
و بعد ما الزبون يتصل بعمو الظابط فى كام كمين على كام مصلحه تبدا المرحله التانيه
على فكره انتوا شباب جامدين قوى.. بس احنا خايفين عليكوا من الدخلاء..
ابقى بلغنا بس قبل اى حاجه هاتعملوهاو كده انت مش خاين على فكره
احنا جهاز وطنى.. و متنساش لما عملنالك كذا و كذا
و تدريجيا يبدا الزبون يغرق فى الوحل من غير ما يشعر
و لو صحى فجاه و حب يرجع و يبطل يبلغ معلومات او حب يلاعبهم و يديهم معلومات غلط بيظهر الوش التانى
نعم يا روح امكانت نسيت نفسك ولا ايه
انت فاكر نفسك هاتلعب بينا ياض
احنا كده هانغير الاسلوب
اللى عايزينه منك هاييجى بالزوق او بالعافيه ..
انت نسيت ولا ايه
و يبدا الوش الخشب
و يلاقى نفسه صعب يرجع تانى
الحل السليم و المنطقى انه يقفل السكه عليهم
اصله لو تعاون معاهم فعلا حتى لو حب يلاعبهم .. عمره ما هيبقى فى السليم
فى عصافير بياخدوا اوامر انهم ينزلوا مظاهرات و لما يتفاجئوا انهم اتمسكوا يجروا على عموا الظابط يسألوا هما اتمسكوا ليه
و بيبقى لمزيد من المعلومات
فاكرين لما اسرائيل باعت المليشيات العميله بعد انسحابها من جنوب لبنان
نفس الموقف بالظبط
اما بالنسبه للعصافير الحزبيه
فمنهم كبار.. و بيبقى منهم اللى بيبقى عايز يمشى امور حزبه من غير ما الامن يضايقه فبيتصل و يقول قبلها.. و لما يقولوله ممنوع بيبقى خلاص ممنوع
و منهم صغيرين
اللى مع العروض المتتاليه بيفكر و يضحك على نفسه و يقول ايه المشكله.. انا برضه معارض زى ما انا.. بس هى السياسه كده و كله بيعمل كده
الحل
اقطع و امنع اى اتصال من الاول... اعتذر له بأدب... و لو لبخ فى الكلام .. لبخ انت كمان... موقفه اساسا غير قانونى
كل ظابط بيبقى همه نفسه و منصبه و تقريره و بس
لا انت و لا البلد كلها تفرق معاه فى حاجه