السبت، 17 نوفمبر، 2007

وهم الثوره القادمه

يعلم العديد من الزملاء رؤيتى للتغيير و التى هى قد تكون سبب لإعادة نشر المقالهفأنا أميل للتغيير الإصلاحى السلمى الذى يأتى عن طريق صندوق إنتخابات ديمقراطيه حقيقيه تتميز بالشفافيه و التنافس الشريف و تزيل النظام الحالى و تضع حكومه إئتلافيه مؤقته و تضع دستور جامع يراعى مصالح مصر اولا و يتفق عليه الجميعو بالطبع هذا حلم بعيد المنال غير واقعى لن يتحقق بالتاكيد فى ظل النظام القمعى الحالى و القوانين الحاليه و الدستور الحالى و مجلس الشعب الحالى و النواب الغير منتخبين الحاليينو لن يتحقق كذلك بسبب شعب جاهل لا يعرف أساسا ما هى فائدة الاحزاب ولا الديمقراطيه ولا معنى تداول السلطه ولا يرى اهميه لحساب الحكام و المسئولين ولا تهمه تلك المسميات اساسا فى شىء ... لا يهمه إن كان يسكن بين تلال القمامه أو يعيش على الكفاف.. المهم انه يعيشلن يتحقق التغيير الإصلاحى فى وجود معارضه مثل الموجوده حاليا ... فهى اضعف من أن تتخذ قرارا موحدا أو ان تتفق على شىءمعارضه متناحره يبحث كل تيار و حزب فيها عن مصالحه الشخصيه الوقتيه و يرفض الإتحاد و التحالف لإسقاط نظام يذبح الجميع... معارضه تتصيد الخلافات و الإختلافات و تعمى أبصارها عن اى نقاط مشتركه يبقى إذن الحل الثورى و المظاهرات المليونيه التى ستحتل ميدان التحرير و تتحرك صوب قصر العروبه ... ذلك الحل الذى يبشرنا به الزملاء الثوريين و "هم يعلمون مدى حبى و تقديرى لأشخاصهم و إخلاصهم لأفكارهم"... و هو حل بصراحه .. أراه منطقى حاليا و بديل موفق فى تلك الظروف و مع تلك السلطه التى لا تعرف سوى لغة القوهو لكن أولا...لابد للثوره من شعب يقوم بهاو شعبنا لا يهمه الإستبداد المهم عنده الاكله و النوم و النومه حتى لو لم يضمن اى منهم ليوم تالىحتى لو لم تتوفر تلك الإحتياجات الاساسيه للبقاء فسوف يتكيف شعبنا و يستطيع العيش بدونهافصحيح ان الجوع كافر لكن الجبن و الجهل الذى تربى عليه شعبنا طوال خمسون عاما اكثر كفرا و سيطرهشعب متعصب استبدل عدائه للقوه الخارجيه المهيمنه و السلطه الداخليه الناهبه و السارقه .. بعداء لبعضه و لذاتهفاصبح التعصب الان من سمات المصريين بدلا من التسامح الذى كنا نسمع عنه قديمافاصبحنا نسمع الان عن فتن طائفيه و صراعات قبليه و عرقيات و تعصب ايدولوجى .. حتى الاهلى و الزمالك أصبحوا كالديانه بالنسبه للمصريينشعب لا يستطيع الثوره ولا يهمه تغيير وضعه فى شىءو معارضه لا تستطيع قيادة الجماهير و غير اهل لثقة الشعب اساساو سلطه عندها من القوه بحيث تستطيع قمع اى بوادر ثورهلا تكلمنى عن شعبنا الواعى و نضاله التاريخى فى عصور مختلفه شهد بها العالم .. فأنت إذا تتكلم عن شعب غير الشعب الحالى و جيل غير الجيللا تحدثنى عن شرارة الثوره التى ستخرج من احد المصانع الصغيره و تجتاح مصر من اسوان للاسكندريه .. فانت اذا لاتتحدث عن ثوره بل تتحدث عن انتفاضه للجياع و فوضى ستقتلع الاخضر و اليابس لن يستطيع احد ايقافها .. لأنها ستكون ساعتها جسد بلا رأس و عقل يحركها طب و الحل الحل من وجهة نظرى المتواضعه هى مشروع توعيه و تحريض و قيادة لذلك الشعب قد يستمر شهور أو سنواتتوعيه باهمية الديمقراطيه و ثقافة قبول الاخر و كيفية تداول السلطه و اهمية حساب المسئولينتحريض و تشجيع للمطالبه بالحقوق فى كل مشكله و كل مناسبه و كل مواجهه للجماهير مع السلطهقياده مسئوله و تثق الجماهير بها قد تكون شخص او حزب او تيار لتنظيم حركة الجماهير سواء جزئيه او كليهو لعلنا نتذكر انه فى السنوات الاخيره خرجت جماهير الشعب فى دول كثيره لخلع سلطات مستبده و تعيين أحزاب غصلاحيه بدلا منهاأى ان فكرة الثوره الشعبيه ليست مقصوره على التيار الماركسى فقط أو اليسار بصفه عامه و لكن الثورات الشعبيه تلجا إليها بعض الاحزاب الليبراليه او ما شابه .. كطريقه مثلى للتغيير فى ظل نظام استبدادى قمعى أرجوا ألا اكون قد أسأت لاحد من الزملاء الذين يعلمون بالتاكيد مدى احترامى لهم .. و لكن اعتقد اننا يجب ان نراجع انفسنا من اوهام تفكك الدوله الوشيك و الثوره الشعبيه القادمه و الشعب الواعى الذى يفاضل بين و بين

بعض المعلومات للطلبه قبل مسرحية الانتخابات الطلابيه

فاجأنا وزير التعليم العالى بميعاد سحب استمارات الترشيح لإتحاد الطلبه بموعد مفاجىء يوم الثلاثاء الماضى بعد انتهاء عيد الفطر مباشرة... بالطبع ميعاد غير مناسب يعيد المخاوف من عدم الشفافيه و يعيد مزاعم طبخ الانتخابات.. مع الوعود التى تكرر كل سنه بالشفافيه فى الانتخابات و عدم شطب المرشحين الغير مرغوب فيهم من قبل الاداره و كلام من هذا القبيل
و تناثر العديد من التعليقات فى الاوساط السياسيه و كثير من الجرائد عن وجود مرشحين يتم الاتفاق عليهم بجميع الكليات بجميع الجامعات ينتمون للحزب الوطنى بالأخص
فقد كانت العاده هى استبعاد جميع الطلبه المنتمين لأى تيار سياسى و بالأخص الاخوان لأنهم الاغلبيه من انتخابات اتحاد الطلبه بحجج واهيه كدواعى امنيه او عدم ممارسة انشطه
و كان من ينجح فى السنوات السابقه إما الطلاب المدعومين من الامن لتنفيذ خطط الحزب الوطنى
أو الطلاب المدعومين من الاساتذه و موظفى الكليه المسئولين عن الانشطه الطلابيه و ذلك لتسهيل التلاعب فى الميزانيه
و هناك بعض المرشحين يحظون بدعم موظفى النشاط و الامن معا و اهو كله بحسابه
و لكن هناك الفئه الثالثه التى اعتقد انها ذات نسبه كبيره و هى الطلبه الخدميين.. يعنى الطلبه الحريصين فعلا على الخدمات و الانشطه .. و هؤلاء لا ناقه لهم ولا جمل فى هذه المؤامرات و لا يشترط ولائهم للامن و لكنهم يبتعدون عن أى نشاط يغضب منهم القيادات سابقة الذكر و لا يبحثون عن المشاكل و إن تعارض النشاط مع رغبات الحزب الوطنى التى هى بالطبع رغبات امن الجامعه او امن الدوله على الاصح فإنهم يبتعدون ولا يدافعون عن افكارهم
و سمعنا كثيرا خلال سنوات تواجدنا بالكليه و كذلك هناك العديد من الحكايات من جامعات مختلفه عن رغبة بعض طلبة الاتحاد المخلصين فى القيام بأنشطه مفيده فعلا للطلاب و لكن جائت اوامر من الأمن برفض النشاط او الندوه او ايا كان المسمى

الجديد هذا العام هو استبعاد هؤلاء الطلبه المسالمون ايضا من دعم الامن و دعم موظفى الكليات ... و استبدالهم بطلبه اعضاء فعليين فى الحزب الوطنى رغم كلام وزير التعليم العالى المعاد بأنه لا سياسه فى الجامعه ولا جامعه فى السياسه

و الجدير بالذكر بان دور اتحاد الطلبه الفعلى هو كدور النقابات الحره و هو الدفاع عن مصالح الطلاب أولا و اخيرا و البحث عن الفائده للطلبه بشتى الوسائل و الانشطه المختلفه و الدفاع عن حقوقهم و الوقوف ضد الظلم و المحسوبيه ... و ليس الاكتفاء بالحفلات و الرحلات و المصالح

و أليكم بعض المعلومات التى قد تكون مفيده للزملاء طلاب حزب الجبهه الديمقراطيه


اللائحة الحالية هي لائحة 1979 اللي الناس كلها طلبة و لجان الحريات معترضة عليها وهي صادرة بالقرار الجمهوري رقم 256 لسنة 1979 وصدرت لقتل النشاط السياسي داخل الجامعات وقمع الحريات.
تم إضافة بعض التعديلات على هذه اللائحة بالقرار الجمهوري رقم 378 لسنة 1984.
وكان هذا آخر تعديل صدر.
إضافة أخرى قبل الإجابة على الأسئلة
بعد الترشيح وإجراء الإنتخابات يتم تشكيل مجلسين
الأول هو إتحاد الطلبة وهو معروف يدعو لحضور إجتماعه أمين الإتحاد أو مساعد أمين الإتحاد أو أمين أي لجنة ويدير الإجتماع أمين الإتحاد أو مساعد أمين الإتحاد أو أمين اللجنة الثقافية أو أي عضو بالإتحاد يتفق عليه الحضور في حالة غياب الثلاث أعضاء الأساسيين – أمين الإتحاد ، مساعده ، أمين اللجنة الثقافية – ويمكن دعوة موظفي رعاية الشباب كأعضاء سكرتارية فقط لا غير وتسجيل محضر الإجتماع.
ومن حق مدير الإجتماع طرد موظف رعاية الشباب في حالة تدخله في سير المناقشات بأي شكل كان.
في حالة وجود أي عضو هيئة تدريس في الإجتماع يبطل محضر الإجتماع ولا يجوز إعتباره إجتماع للإتحاد الطلبة.
المجلس الثاني هو مجلس اتحاد الكلية وهو مكون من رواد الأنشطة من أعضاء هيئة التدريس + أمناء اللجان + مدير رعاية الشباب + محاسب من إدارة حسابات الكلية.
هذا المجلس معني بمراجعة الميزانية.
الميزانية = ميزانية إتحاد الطلاب + بنود الميزانية المتعلقة بالطلاب وكل متعلقاتهم ويستبعد من ذلك كل ما يتعلق بأعضاء هيئة التدريس.
يجب أن يعتمد مجلس الكلية الميزانية ويكون ترتيب الإمضاء
أمين اللجنة الثقافية يليه باقي أمناء اللجان بأي ترتيب ثم أمين إتحاد الطلبة وفي حاله تغيبه يوقع عنه أمين مساعد الإتحاد ثم إمضاء مدير مكتب رعاية الشباب ثم رائد الشباب – عضو هيئة تدريس – ثم وكيل الكلية لشؤون الطلاب و محاسب الكلية.
في حالة رفض أي عضو التوقيع على محضر الجلسة أو الميزانية يجب عمل محضر وإثبات رفضه التوقيع و لايصح أي توقيع بديل عنه وإعلان أسباب الرفض والميزانية كاملة في لوحة إعلانات الإتحاد ويحق للعضو المعترض التقدم بشكوى للجهات المختصة – النيابة والجهاز المركزي للمحاسبات - .

و هذه بعض الأسئله الهامه من وجهة نظرى و التى طرحتها على طالب محترم و محايد له خبره كبيره فى الاتحادات الطلابيه... و كانت إجاباته عظيمه و ثريه كما ستلاحظون

ما هو الدور الفعلى لعضو اتحاد الطلبه و هل هناك إختلاف بين الدور المتعارف عليه و الواقع؟
الدور الفعلي ينقسم جزئين الأول بعيد عن الأنشطة والثاني متعلق بالأنشطة
الجزء الأول:
التواجد الحقيقي بين الطلاب وسرعة نقل المشكلات مباشرة من الطلاب إلى أعلى سلطة موجودة بالكلية لحظة وقوع المشكلة لحلها بأسرع شكل.
تمثيل كافة الطلاب كمحامي دفاع عنهم ويعتمد ذلك على الإلمام التام بلائحة الجامعات بما تتضمنه من تنظيم لجداول الإمتحانات و عمليات سير الإمتحانات و تحديد المصاريف و ومستحقي المساعدة الإجتماعية و الرعاية الطبية إلخ إلخ.
أمين إتحاد الكلية يجب أن يحضر أي تحقيق يتم مع أي طالب – تحقيق من إدارة الكلية أو أي جهة أمنية - ويجب إخطاره بميعاد التحقيق قبل البدء فيه ب 72 ساعة.
في حاله تغيبه يحضر بديلاً عنه أمين اللجنة الثقافية أو أمين مساعد الإتحاد بالترتيب المذكور.
الجزء الثاني:
الأنشطة كل لجنة حسب نشاطها وأفترض معرفة الجميع بأنشطة اللجان.
و هل هناك إختلاف بين الدور المتعارف عليه و الواقع؟
أعتقد الإجابة أوضح من ذكرها
ما هى اللائحه الطلابيه سواء القديمه او المحدثه و هل يعلم الطلاب المترشحين للانخابات ببنودها؟
ارد على الشق الثاني من السؤال
هل يعلم الطلاب المترشحين للانخابات ببنودها؟
مش حاتكلم عن الطلبة بس أنا لما كنت أمين اللجنة الثقافية كنت محول للتحقيق و المحقق اللي كان بيحقق معايا كان لا يعلم أي شيء عن بنود اللائحة ورغم تحويلي للتحقيق أكثر من مرة وتغيير المحقق بمحقق أعلى فلم يتم توقيع أي جزاء للإلتزامي الكامل بالقوانين واللوائح. وكانت ردودي دائما في التحقيق بناء على المادة رقم كذا من قانون رقم كذا. ملخص الإجابة الجهات المعنية بالتحقيق مع طلبة الإتحاد لا تعرف أي شيء عن اللائحة واللائحة كأنها سر بناء الهرم الأكبر يعجز الطلبة عن الحصول عليها مالم يلجأ لمحامي ، أو يكون له إهتمامات بالقانون والدستور.
بالنسبة للشق الأول من سؤالك

اللائحة القديمة
اللائحة الجديدة مقترحة وتم تنفيذ بعض بنودها عن عام 2005
طلاب التعليم المنتظم فقط يحق لهم التقدم للترشيح وممارسة الأنشطة
تم إضافة طلاب التعليم المفتوح وطلاب الإنتساب
أهداف الإتحاد ثابتة
تعميق مفاهيم الديمقراطية وحقوق الإنسان
تشجيع تكوين الأسر والجمعيات المهتمة بالأنشطة العلمية والبيئية وحقوق الإنسان
في تعديل لائحة 84 تم فصل لجنة النشاط الثقافي عن الفني
في لائحة 2005 تم إضافة لجنتي
الإعلام والعلاقات العامة
و لجنة النشاط العلمي والتكنولوجي
نشاط اللجنة الثقافية كما هو
تم إضافة تعميق الوعي الثقافي ومفاهيم الديمقراطية وثقافة حقوق الإنسان
من حيث تنظيم الأنشطة كما هي بإلتزامهم بالتوقعيات المطلوبة لإقامة أي نشاط
يتم إجراء أي نشاط لأي لجنة بتوقيع أمين اللجنة فقط أو أمين مساعد اللجنة
في حالة عدم وجودهم او رفضهم التوقيع يوقع عنهم أمين إتحاد الطلبة أو أمين مساعد الإتحاد أو أمين اللجنة الثقافية. ويقوم أي من الثلاثة المذكورين بإخطار – إخطار فقط لا غير – وكيل الكلية لشؤون الطلبة بالنشاط قبل إجراءه ب 3 أيام ولا يشترط موافقته وفي حالة وجود تنظيم للنشاط على مستوى الجامعة يلزم إخطار الجامعة قبل بداية النشاط ب 7 أيام.
مصادر تمويل الإتحاد كما هي
تم رفع نسبة المستقطع من مصاريف الطلاب من 1.5 جنيه إلى 10 جنيهات لصالح الإتحاد.
النصاب القانوني لصحة الإنتخاب 50%
نفس النسبة
في حالة عدم إكتمال النصاب تعاد الإنتخابات ويكون النصاب القانوني هو 20% وفي حالة عدم إكتماله يقوم عميد الكلية بتعيين مجلس
في حالة عدم إكتمال النصاب تعاد الإنتخابات ويكون النصاب القانوني هو 25% وفي حالة عدم إكتماله يقوم عميد الكلية بتعيين مجلس

طبعا كل اللي مكتوب في الشمال نصه هجص ومن أول طلبة الإتحاد بيتم إعتقالهم وتهديدهم خاصة في فترات الإمتحانات ومناقشة المشاريع. بغض النظر عن ان اللائحة بتدي حصانة لطلبة الإتحاد من إعتقالهم.

3- هل هناك حظر لممارسة السياسه فعلا فى الجامعه .. و لماذا نرى الحزب الوطنى فقط فى الجامعه من خلال جمعية حيل المستقبل او من خلال كورسات و رحلات الحزب الوطنى... و كيف يتم منع باقى الاحزاب و التيارات السياسيه من تقديم خدمات لطلاب الجامعه؟
طبقاُ للائحة 79 يوجد حظر ممارسة أي نشاط سياسي داخل الجامعة. وأيضاً يحظر على الأمن (أمن مركزي أو أمن دولة ) مجرد الدخول للحرم الجامعي.
من فترة كان يوجد رسالة زميل يستفسر عن تهمة طالب هندسة المنصورة او الزقازيق الذي تم نشر صور إعتقاله من داخل الكلية.
بغض النظر عن التهمة فلا يحق إعتقاله أو القبض عليه داخل أسوار الكلية او تدنيس الحرم الجامعي من قبل اي جهة أمنية طالما الفرد يحمل كارنيه عضوية سواء طالب أو عضو هيئة تدريس والأمن الموجود بالمنشآت التعليمية هو أمن منشآت فقط للحفاظ على سلامة المنشآت و الأجهزة فقط لا غير.
و لماذا نرى الحزب الوطنى فقط فى الجامعه من خلال جمعية حيل المستقبل او من خلال كورسات و رحلات الحزب الوطنى...
بلطجة طبعاً
و كيف يتم منع باقى الاحزاب و التيارات السياسيه من تقديم خدمات لطلاب الجامعه؟
بوسيلتين الأولى شطبهم من الترشح وبذلك يلزمهم موافقة لإجراء أي نشاط.
الثانية جهل الطلاب أنفسهم في حالة عدم كونهم أعضاء بالإتحاد بعدم ضرورة الحصول على موافقة رعاية الشباب او او او لتنظيم نشاط ويلزمهم فقط توقيع أمين اللجنة المختصة.
إذا كان أمين اللجنة المختصة فرد محترم سيقوم بالموافقة على تنظيم النشاط حتى إذا أختلف إنتمائه مع الأحزاب والتيارات السياسية الأخرى.
شرط صحة تنفيذ هذا الموقف
عدم رفع أي لافتة أو شعار حزبية يتم تنظيم النشاط تحت أسماء الطلبة المنظمين أو اللجنة الراعية فقط لا غير.
هل هناك صحيح تجاوزات ماليه فى الميزانيه و الدعم يشارك بها اعضاء اتحاد الطلبه سواء بعلم او بدون علم لصالح بعض الموظفين و الاساتذه؟
بعلم وبجهل الطلبة بتشارك
و
لصالح موظفين واساتذه
المفترض في طالب قرر يرشح نفسه لخدمة زملائه أولاً أنه يلم بكامل النواحي القانونية والمادية بالإتحاد وإلا أصبح مشارك في الفساد بإهماله وجهله.
طب لو طالب عاوز ينهب ويمصلح؟
يبقى يتجه على طول للجنة الإجتماعية وتنظيم الرحلات ، ودي اللجنة الوحيدة اللي ما بتقدمش فواتير و موقفها قانوني! طالما لا تحصل على دعم للرحلة وده اللي بيحصل المنظمين يقولوا مش عاوزين دعم في المقابل مفيش فواتير
تطلع رحلة للإسكندرية او العين السخنة تكلفتها الفعلية 15 جنيه أو 20 جنيه لكن الإشتراك ب 35 جنيه ، ويفتح باب للمرافقين ب 45 جنيه.
طب لو موظف؟
في لجان مراقبة نشاط من الجامعة لما اللجنة تيجي يتعمل مذكرة لمضايفة اللجنة من ميزانية الإتحاد يقولوا جبنا أكل ومشروبات و و و و بالقيمة الفلانية طبعا بدون فواتير.
الأساتذة؟
منجم الذهب هو لجان الحفاظ على البيئة وصاحبة أعلى تمويل خارجي للجامعات.
أخيراً
تعليق على مجمل كلام احمد ممكن تقدر تبني وتحارب الفساد بالقانون خاصة انك بتواجه ناس القانون في إيدهم لكن فعلياً ايه اللي بيحصل؟
مع كامل إحترامي لطلاب الإخوان
حالة **** شديد والنطح في جدار من صلب وإعطاء فرص ذهبية للإدارات الكليات بوقوعهم تحت طائلة القانون وفصلهم و و و و.
طب ايه النظرية؟ مش عارف!
آخر حاجة وهي الأهم
ايه سر الحرب على الإتحادات؟
غير بقى ان الطلبة تفوق وكل الكلام ده
بعد إنتخاب إتحاد طلاب الكلية يتم الدعوة للإنتخاب إتحاد طلاب الجامعة.
بعدها يحق لأي ثلاثة أمناء إتحاد جامعات مصرية حكومية الدعوة للإنتخابات إتحاد طلاب مصر.
وأمين إتحاد طلاب مصر هو العضو رقم 445 بمجلس الشعب المصري.

نقطة عطر 2 --- صائد الفراشات

صائد الفراشات

ظل صائد الفراشات يراقب فراشته فى إهتمام شديد
إنه لم يرى مثلها من قبل .. ربما لا تكون بجمال فراشات كثيره صادها قديما كانت ايه فى الجمال تخلب العقول و الألباب
و لكن تلك الفراشه مختلفه عن سابقيها
فهى مرحه جريئه جميله .. تظل تتقافز فى كل مكان و تملأ الجو مرحا طوال الوقت
لا تخاف من صياديها مهما كانت قوتهم و ثقتهم فى انفسهم
إنها جذابه يجرى ورائها الجميع بما فيهم صديقنا الصياد القوى يريدون صيدها و لكنها فجاه تختفى فى مكان غامض
ذات يوم تبعها الصياد حتى ذهبت لمكانها البعيد .. فرأها من وراء الشجيرات تطير حول شخص يتضح البله الشديد على وجهه
انه ابله مسكين لا يعى من امرها شىء
حطت فراشتنا الرقيقه التى يفشل الصيادين فى صيدها على كتف الابله و هو ينظر إليها نظرته الفراغيه غير عابىء بها
أحيانا يحاول الأبله إلتقاطها فتترك نفسها اليه فيؤلمها بأصابعه الغليظه
تحاول الفراشه اقناع الابله أن يقتنيها و يحتفظ بها له وحده .. فهى نادره لا يوجد مثلها فى ذلك الكون … ينظر إليها لا يعى من كلامها شىء
يضحك لها ضحكة بلهاء تائهه تزيد من المها
ينتاب الصياد القوى ذهول شديد عندما يراها تتوسل للأبله و تبكى على أصابعه أن يقتنيها و يحتفظ بها فهى له وحده دونا عن العالمين .. رغم علمها ان من يقتنيها و يضمها لمجموعته لابد ان ينهى حياتها أولا
فغر الصياد فاهه و كاد يغمى عليه عندما استدار الابله منتبها إليه … فوجده انه يشبهه تمام الشبه

حراااام كفاااايه

ناديه الجندى ... كفاااايه الهام شاهين .. كفااايه فيفى عبده ... بااااطل يسرا ... حرااااااام


دى هتافات ببقى عايز اهتفها كل يوم بعد الفطار لما بحس بالتشنجات اللى بتجيلى لما حد بيجيب اى مسلسل للحثاله دول
السنه دى حاولت استحمل علشان اراعى مشاعر و ذوق مراتى أو أهل مراتى أو اى ضيوف
لكن برضه مستحملتش
السنه دى جاتلى تشنجات اصعب و لقيت رقبتى بتحدف شمال
شوية ممثلات عواجيز اكل الدهر عليهن و شرب و عمل حاجات تانيه مش هاقدر اقولها علشان انا صايم .. مثال للحثاله و الزباله فى حياتهن الشخصيه بيحاولوا يمثلوا أدوار ملايكه مثاليين
كل واحده منهن عامله دور خضره الشريفه اللى هاتصلح الكون
المشكله ان مسلسلاتهم مافيهاش اى قيمه .. دى مجرد سبوبه ليهم بيحاولوا بيها يرجعوا للشاشه بعد لما الناس زهقت منهم و من قرفهم
انا بجد كرهت زعيق ناديه الجندى و معاركها الوهميه للدفاع عن الفضيله .. و عياط الهام شاهين و مناخيرها الحمرا كل سنه
و نهيق فيفى عبده و جهلها حتى فى التمثيل
كله كووووم و يسرا كووووم
يمكن المسلسل اللى تابعته شويه مع "حماده عزو" هو مسلسل" قضية رأى عام"
قلت يمكن تكون يسرا عايزه تقول فكره محترمه المره دى
و بالفعل تناسيت تشنجاتى منها فى السنوات السابقه و قلت اديها فرصه تانيه
و بالفعل اعجبتنى فكرة المسلسل و بدات انفض لاخطائه
نفضت فى البدايه لكونهن طبيبات محترمات و تم اغتصابهم... اعتقد ده مابيحصلش
معظم قضايا الاغتصاب اللى الواحد سمع عنها بنلاقى فيها ان واحده ماشيه لوحدها بعد نص الليل و لابسه ملابس مستفزه و مثيره جنسيا
و نفضت لحكاية انهم نزلوا بالعافيه من عربيه مع انى اعتقد ان ده صعب
و نفضت لحكاية ان المغتصبين ناس متدلعه مش عندهم كبت جنسى
و لما لقيت اهتمام ظابط المباحث بالقضيه قلت عادى يمكن علشان هى دكتوره كبيره
و لما لقيت الظابط محترم مع انه ظابط مباحث .. قلت عادى يمكن المسلسل بيحكى عن ظابط المباحث المحترم الوحيد فى مصر
او يمكن بيحكى عن نموذج يتطلع اليه كاتب المسلسل
اهو برضه فيه ظباط محترمين بنلاقيهم فى الترحيلات او السياحه او المطار يمكن نقلوا واحد منهم للمباحث قريب
لغاية ما لقيت الظابط بيستمر فى التحريات عن ابن الوزير
دى بقى واسعه
ه لو ابن ملازم هايداروا عليه
احنا فى مصر بلد المعجزات
شويه الاقى الواد يتقبض عليه
و الاقى العدل بياخد مجراه
و الواد ابن الوزير بيترمى فى زنزانه عاديه و ده مستحيل فى مصر حتى لو اتقبض عليه فعلا
و قال ايه كل الوزرا الشرفاء باعوا الوزير ابو الواد
ووكيل النيابه بيطيق القانون
دى بقى اللى مفدرتش استحمل عندها
انا شوفت بعينى ظابط امن الدوله بيتصل برئيس النيابه و يسب له الدين فى التليفون لو ماقالش حاضر يا فندم او حاول يفرج عن معتقلين بدون تهم
و تلاقى التليفونات من النائب العام شخصيا بتهدد و تتوعد وكيل النيابه لو فكر فى الافراج عن الابرياء
و ادينا اهوه بنشوف مجاملة النيابه و الطب الشرعى لظباط الشرطه اللى بيعذبوا و بيقتلوا ابرياء
انا اتاكدت ان المسلسل ده متألف من ظابط امن دوله بعد مشهد اثار التعذيب اللى العيال عملوها فى نفسهم و ازاى الجرايد بتكتب و بتشوه صورة الظباط لملايكه
كفايه كده عن يسرا لإن رقبتى قفشت و بتحدف شمال و انا قاعد بكتب دلوقتى
نيجى بقى ليحى الفخرانى و يوسف معاطى
و الاتنين بعتبرهم من العمالقه
و بحب كتابات يوسف معاطى الساخره من سنين
لكن شكل علاقته و صحوبيته الجديه بعادل اماما اثرت على افكاره و مبادئه
قال ايه ظباط امن الدوله ملايكه و بينصحوا الطلبه انهم يبطلوا مظاهرات ... و كمان بيتكلموا من غير سب دين و شتيمه
و كمان بيستدعوا اهل المعتقلين و يسلموهم ابنائهم ... يا سلام يا سلام
و قال ايه الطلاب اللى بينزلوا مظاهرات معدقين نفسيا و بيكرهوا المجتمع و الحكومه الطيبه و بيكسروا فى البلد
و كمان اسمهم حركة طلاب من اجل التغيير
يعنى حركه كانت موجوده بالفعل من سنتين

بصراحه
مافيش غير تامر و شوقيه
اهو هجص بس بيعرفوك الاول انه هجص مش بينصبوا عليك

ghosty


نقطة عطر - اول نقطه - عصفور


كعادتها دائما … كالزهره الجميله اليانعه التى لا تستطيع ان تقطفها و تقتنيها من فرط جمالها …. كالبدر فى منتصف شهر عربى
كعادتها دائما تزلزل كيانه ووجدانه
كعادته ..احتضنت عيناه عيناها الرقيقتان .. و لكنهما هربتا هذه المره ….. كالعصفور الصغير الذى يهرب من بين يديك بخفه ثم يطير
ترى ما الذى منعنه من اخذه لهذا العصفور و ايداعه قفصه الذهبى طوال تلك القرون البائده …. أهو الخوف من عضة منقاره الرقيق .. ام الخوف ان يهرب من بين يديه …. يا له من جبان
يخاف من عضة عصفور رقيق و يترك قفصه الذهبى خربا ألاف السنين
.

احدى معجزاته و كراماته - حفظه الله

معجزة المرور
طبعا كلكوا عارفين انا بحب رئيسنا العظيم “حسنى مبارك” إزاى – حفظه الله و رعاه من شر المرض و الموت – علشان كده هاكلمكوا عن بعض افكاره العبقريه اللى محدش وصل ليها قبل كده لا في الماضى و لا في المستقبل
هاستكمل الاول كلامى عن المدن الجديده .. و دى اول اختراعاته اللى الدول المتقدمه لسه ما وصلتلهاش… و بما انه بينسب كل حاجه لنفسه و لعبقريته و حكمته الغير مسبوقه يبقى المفروض انه يتحمل كل شطحاته و سوء ادارته و سوء اختياره للحراميه قصدى للمساعدين و جهله – يوووه انا اسف نسيت إن اللى بيتكلم دلوقتى عنه بيتحبس … طيب هحاول ماغلطش فيه لكن مع التذكير انه بشر عادى مش إله
و بما انى مهندس مدنى فأكيد عندى معلومات عن شىء اسمه هندسة التخطيط
فمثلا أى مدينه جديده بيتخطط لها بيكون فيه حاجات كتير اهم من الشوارع الواسعه و الجناين … المفروض بيتحسب عدد السكان هايكون كام بعد عشرين سنه أو اكتر و يتعمل حساب مواسير المياه و الصرف على كده مع ترك امكانيه للزياده عند الحاجه …. و كمان بيتحسب عرض الشوارع المناسب لأى زياده مستقبليه و بيتساب حرم للطريق لسهولة توسيعه عند الحاجه و كمان بيتعمل رصيف عريض و كبير… و طبعا بيتحسب اماكن الانتظار و شبكة المواصلات الداخليه و الأهم من ده كله هو الطرق الموصله للمدينه و بدائلها عند الطوارىء.. و يمكن يكون منكم حد يسمع عن تخصص اسمه هندسة النقل والمرور و ده علم مهم جدا في الدول المتقدمه و احد فروع الهندسة المدنية .. و مهندسين المرور بيكون من ضمن عملهم انهم يحسبوا على الواقع عدد السيارات بجميع انواعها و اتجاهاتها وكمان أعداد المشاه في جميع الاوقات خصوصا أوقات الذروه و المواسم لجميع الاماكن داخل المحافظه الواحده ثم الحى الواحد ثم المنطقه الواحده و يربط كل دول ببعض و يخطط اماكن اشارات المرور ووقت الإشاره و الاماكن اللى محتاجه كوبرى أو محتاجه نفق سيارات أو نفق مشاه و كمان بيحدد شبكة الطرق و عرض الطريق و امكانية توسعته … و كله بيكون بالحسابات الدقيقه جدا جدا … المشكله انه في مصر بيكون على مزاج الرئيس علشان يزعم بعد كده انها انجازاته اللى نزلها عليه الوحى … و الاسخم إن التحكم في المرور و الاشارت و التدفق متروك لعسكرى الشرطه الغلبان و ظباط وزارة الداخليه اللى بيكونوا جايبين خمسين في الميه في الثانويه العامه و كل اللى يفهموا فيه هو إزاى يعذبوا الناس و يقرفوهم
طب نسال نفسنا سؤال … ليه في مصر مفيش تخطيط و ليه كله ماشى بالبركه و ليه رجال المرور ال…… (تم حذف الشتيمه بسبب الصيام) هما اللى بيتحكموا في تخطيط و إدارة المرور مش مهندسين المرور أو المهندسين المدنيين
هاقولك جزء من الإجابه لضيق وقتك ووقتى .. الكبارى عندنا مش بتتعمل طبقا لإحتياجات تدفق المرور .. دى بتتعمل علشان الرئيس يروح يفتحها و يسميها معجزات .. رغم اننا محتاجين اضعاف ما هو موجود من كبارى و انفاق لتحقيق سيوله مروريه و رغم إن كل المشروعات دى من فلوس الضرايب اللى بندفعها في كل الخدمات يعنى من فلوسنا مش هبه ولا هديه من مبارك
و كمان لإن وزارة الداخليه هي اللى بتحكم مصر في كل حاجه فبدل ما تستكفى بتطبيق القوانين في المرور … لأ دى كمان هي اللى بتدير المرور و بتخططه علشان كده فاشل زى ما هما فاشلين (لاحظ انى صايم و بحاول ماشتمش)
خد مثلا عندك مدينة 6 اكتوبر .. اهى مدينه جديده و كل يوم عدد السكان فيها بيزيد ززز و مليانه عشرات الجامعات الخاصه و المعاهد و مئات المصانع .. و رغم كده مافيش فيها أى مواصلات داخليه .. يا إما تركب تاكسى يستغلك يا إما تستنى ميكروباص و إنت و حظك … و لعبقرية مبارك تلاقى إن 6 اكتوبر و زايد مالهومش مدخل غير المحور … و ده عباره عن طريق طويل حوالى عشرين كم و متقسم 3 حارات و في الأخر بيصب عليه الطريق الدائرى و في اوله بيصب الطريق الصحراوى و اللى جاى من الهرم .. و بعد ده كله تلاقيه اتحول حارتين و بيصب في شارع جامعة الدول أو كوبرى 26يوليو … و طبعا شارع جامعة الدول أو الكوبرى دايما زحمه فبيخلى المحور بطىء من اول تقاطع المحور مع الدائرى.. و يا سلام بقى لو حصلت حادثه على المحور أو عربية عطلت فجأه .. تلاقى المحور كله واقف لإنه طبعا طبقا للتخطيط العبقرى مالوش اى منزل أو مخرج أو مطلع و لا فيه اى خدمات ولا حتى محطة بنزين واحده
دا غيرإن اساسا اساسا – المحور نفسه مرصوف غلط و تحتيه تربه طفليه بتهبط مع الوقت .. ولا حد عمل إحلال للتربه و لا حد طبق اى قواعد هندسيه … و دلوقتى بيصلحوه رغم كل المشاكل اللى بتحصل و هو سالك فما بالك بقى بأول موسم الدراسه و شهر رمضان… يبقى العمليه اكيد عذاب و جحيم يومى للطلاب أو العاملين باكتوبر
يعنى خلاصة الرغى ده كله إن المشاريع دى كلها سواء مدن جديده أو طرق أو مشاريع بنيه تحتيه هي تطور طبيعى و غحتياجات سكانيه مش هبه و لا عبقريه من حد .. و عن مبارك بينسب ده لمعجزاته و كراماته .. و بسبب انه كذاب و نصاب و حواليه نصابين فبتطلع المشاريع بايظه و فاشله و بيبان إن تفكيره عشوائى و فاشل
يعنى المفروض انه يتحاسب عن غباؤه و فشله سوء إدارته

و لنا في الحديث بقيه عن الإنجازات الفاشله و كله من برنامجه الإنتخابى اللى قرفونا بيه

ghosty
ماهرى حتى النخاع …. و لتسقط كل الاصنام

تساؤلات من أحد الأطباء حول شهيد التعذيب فى شها سبتمبر 2007

تساؤلات من أحد الأطباء حول شهيد التعذيب فى شها
نبص مع بعض على الصورة رقم 1

هتلاقى حول العين الشمال جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه ىمفيش فيها لون أزرق يعنى مافيش كدمة يعنى ديه مش ضربة مباشرة …!!!أمال ده ايه…… أتسحل على وشه…؟؟؟؟؟؟ لأنها لو خبطة يبقى لازم يبقى حوالها كدمة…؟؟؟؟
بص للصورة رقم 2
لما نبص فى الصورة بلاقى الانبوبة داخلة من أعلى فى الصر (جنب اللون الاخضر) لكنمنينوده بيستعمل لإفراغ الهواء ليه بقى لأنالهوا بيطلع فوق فتبقى الانبوبة راكبة فوق المية بتنزل تحت فتبقى الانبوبة راكبة تحت والنبوبة راكبة فوق يبقى بتصفى ايه…هوا …اسم الله عليك
بص كدة للصورة رقم 3
بص كدة على لوح الكتف وقوللى هتلاقى ايه…؟؟؟ جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه مفيش فيها لون أزرق يعنى مافيش كدمة وخد بالك أن الجلد الفاتح هنا عامل زى مايكون خط مستقيم
علىالحافة الداخلية للوح الكتف وخد بالك أنها متوافق مع وضع الذراع وهو مضموم بجانب الجسم من الامام يعنى الولد ممكن وبقول ممكن أو غالباً انه اتسحل من رجليه وايديه كانوا مربوطين من الامام .طب ليه مانقولش أن انه أتسحل من أيديه لأنه لوح الكتف ساعتها بيقى مايل أكتر من كدة بكتير(كأنك لرافع أيديك لفوق) وكمان اللى بيبقى معرض للأرض ساعتها مساحة كبيرة من العضلات فى لوح الكتف مش حافة لوح الكتف الداخلية…..!!!!!.
نبص كدة على الصورة رقم 4:
هنلاقى حتة لونها غامق جداً عامل زى مايكون متفحم وبعدين الحتة دى محددة المعالم ده ايه…؟؟؟!!!!د ه حرق ولّا ايه بالضبط…؟؟؟!!!
طب بص كدة على الصورة رقم 5


هتلاقى قرحة صغيرة محددة عاملة زى ماتكون حاجة محددة و “حديثة”(لأن الجلد بتاعها ملحقش يتلون وياخد لون بقية الجلد)وبعدين الحاجة اللى عملتها مش سحل لاء دى حاجة صغيرة وحديثة..!!!
بص كدة على الصورة رقم 6
دى زى الصورة رقم 5 بالضبط بس دى موجودة تحت الخصية (أسمه الدقيق كيس الصفن) دى مستحيل تكون حاجة قديمة ومش ممكن تكون سحل برضه “دى حاجة محددة جداً جدا وحديثة أيضاًً”
بص كدة على الصورة 7

شوف ال 3 حتت اللى داخلين لجوة دول ايه ..؟؟؟ دى حاجات غير حادة ومكان دى حاجات مش صغيرة . ةهم الصراحة أكتر من 3 بس خالينا فى دول الاول.بص عليهم فى صورة 7 وصورة 7 A وبعد كدة بص عايهم فى الصور من 7 A إلى 7 F وقوللى ايه رأيك وليه الصور دى عاملة زى ماتكون رجل بنى آدم وكمان زى ماتكون رجله الشمال( بص كدة على الصورة 7 G وتخيل لأن ده أثر رجل فى الطين وهتفهم أنا قصدى أيه بالضبط)…..؟؟؟؟!!!!!!!!!!!!!!!

طب بص كدة كمان بص على 7h وقوللى يا شيخ بأمانة ربنا مش ده كدة منظر أثر لجزمة وكمان من النوع اللى على الموضة( أبو بوز طويل) و لّا لاء
بص كدة على صورة رقم 8
وقوللى ايه أسباب الكشطة دى …؟؟؟ مش ده منظر جلد مكشوط وطلع مكانه جلد جديد ولّا لاء …..؟؟طب ايه سببه…….؟؟؟؟!!!!!! وأبقى أرجع تانى بص على الصورة رقم 7 وقوللى أيه سبب المساحات الكبيرة دى من الجلد المكشوط ده..؟؟؟؟؟
طب بيجى لجملة هبوط حاد فى الدورة الدموية والتنفسية(اللى هى بيقولوا أنها سبب الوفاة):
أساساً الهبوط الحد فى الدورة الدموية والتنفسية ده ممكن يكون لأى سبب بمعنى:
ممكن يكون الواد أنضرب وحصل له نزيف داخلى أدى إلى هبوط الدورة الدموية والتنفسية
وممكن يكون أتكسر له ضلع فلما يتكسر ضلع ممكن يحصل قطع فى الغشاء البلورى ويحصل حاجة زى وصلة بين الفراغ البلورى و الهواء داخل الرئة وبعدين الهواء اللى دخل الفراغ البلورى يتراكم ويزيد مع التنفس(ولابد من إخراجه عن طريق وضع قسطرة أو أنبوبة توضع فى أعلى مكان فى الصدر تقريباً زى اللى فى صورة 2 عند الدايرة الخضراء) وبعدين الهواء اللى دخل فى الفراغ البلورى يمنع الدم أنه يرجع من القلب للعروق (Impaired venous return) وده كمان بيعمل هبوط حاد فى الدورة الدموية والتنفسية
وممكن يكون جاله إلتهاب رئوى وده على أساس أن أخوه قال أن فمه وانفه كانوا بيجيبوا دم فممكن الدم ده من كِبَر حجمه يدخل إلى القصبة الهوائية ويعمل إلتهاب رئوى pneumonia)ِِِِِِِِِِِAspiration )
ودى كمان تعمل هبوط حاد فى الدورة الدميوة والتنفسية
فالسؤال المهم إذا كانت الوفاة حصلت بسبب هبوط حاد فى الدورة الدموية والتنفسية ؛ أيه اللى عمل الهبوط ده….؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!
وهخل من الطبيعى أن الحاجة اللى عملت الهبوط فى الدورة الدموية والتنفسية تحصل لولد عنده 15 سنة..؟؟؟!!!!
والسؤال الاهم ايه سبب العلامات دى على الولد وبعدين فى سؤال مهم كمان هل الولد ده اتكسر له ضلوع ولّا لاءو لو فى ضلوع مكسورة ؛ايه تأثير الكسور دى على الحالة الصحية للولد الصغير ده..؟؟؟!!!!!!!!
طبعاً دى كلها تساؤلات أرجو من الطب الشرعى الشامخ (وكل شى شامخ فى بلدنا)وكلامه على راسنا إحنا من فوق أنه يرد على واحد حمار زىّ مابيفهمش فى حاجة خالصصصصصصصصص

الجمعة، 14 سبتمبر، 2007

تقرير مهم لل بى بى سى - ماذا بعد مبارك

احمد عبد الرازق
بي بي سي
مبارك نفى مرارا اعداد ابنه جمال لتولي الحكم
اذا كانت الشائعات التي اقامت الدنيا ولم تقعدها بشأن صحة الرئيس المصري حسني مبارك في سبيلها إلى الخفوت تدريجيا بعد اسابيع من الجدل فإن الحجر الذي القته في بحيرة السياسة المصرية التي يغشاها الركود لا تزال دوائره تتسع يوما بعد يوم.
ولإن اغلق باب الشائعات فإن بابا أوسع قد فتح على مصراعيه، هو باب القلق على مستقبل بلد يعد الاكبر من بلدان العالم العربي بعدد سكانه وبدوره في المنطقة.
ورغم ما أوغل فيه المراقبون والمحللون من تكهنات حول أن الشائعة كانت بمثابة بالون اختبار من قبل المؤسسة المصرية الحاكمة نفسها يهدف إلى اعداد الخليفة القادم للرئيس المصري والذي يتكهن كثيرون بانه نجله الاكبر جمال مبارك، فإن كثيرا من المصريين يرون أن الشائعة وضعت البلاد فجأة على حافة المجهول اذ ان الناس اخذوا يفكرون فيما سيحدث في حالة مارحل الرئيس وهو تفكير مشروع رغم الاستنكار الذي تستقبل به مؤسسة الحكم في مصر أي حديث عن صحة الرئيس.
وللمصريين الحق في القلق إذ أن معظمهم لم يعرف رئيسا لمصر سوى مبارك منذ عام 1981 وقد ترسخت في اذهانهم صورته كرجل دولة يقبض على كافة مقاليد السلطة في البلاد رغم المطالبات العديدة من عدة اطراف سياسية بإصلاحات تتيح وجود مؤسسات حكم قادرة على ادارة البلاد في حالة اي غياب مفاجئ للرئيس.
وكان مبارك قد رفض طوال تلك الفترة تعيين نائب له متعللا بأنه لا يجد الشخصية المناسبة.
وتشير الإحصاءات إلى أن خمسين بالمئة من المصريين البالغ عددهم ثلاثة وسبعون مليون نسمه ولدوا في عهد الرئيس المصري حسني مبارك الذي يحكم مصر منذ اكثر من خمسة وعشرين عاما.
وفي مصر وفي وقت كانت فيه الشائعة تسري كالنار في الهشيم كان الحديث الدائر بين المصريين حول المخاوف من القادم وإحتمالات أن يفجر رحيل الرئيس صراعا معلنا على السلطة.
وفي مدينة الاسكندرية الساحلية حيث انطلقت الشائعة بشأن صحة مبارك للمرة الاولى قال لي سائق سيارة أجره إنه يخشى من ان تستغل طبقات اجتماعية ظلت مكبوتة ومحرومة لفترات طويلة أي انفلات أمني قد يلي رحيل الرئيس في عمليات نهب أو ماشابه.
كل ذلك يلخص حالة القلق التي يفسرها كثير من المراقبين بأنها تعود إلى أن الحكم في مصر ارتهن طوال الستة والعشرين عاما الماضية بشخص الرئيس الذي يحظى بسلطات واسعة ومطلقة حاولت الجماعات السياسية المختلفة تقليصها على مدار سنوات لكنها لم تصل إلى نتيجة.
من الشائعات إلى التداعيات
هل يمكن القول ان الجدل انتقل الان من الشائعات إلى تداعيات تلك الشائعات وما فتحته من أبواب حول مستقبل الحكم في مصر بعد مبارك ؟
من وجهة النظر الدستورية يرى الدكتور يحيى الجمل خبير القانون الدستوري في مصر إن الوضع خطير جدا وأنه يضع مصر على حافة حالة من عدم الوضوح، ويقول الدكتور يحيى الجمل إن الدستور المصري بنص على أنه وفي حالة رحيل الرئيس فإن رئيس مجلس الشعب يتولى السلطة خلفا له على أن تشهد البلاد انتخابات لاختيار رئيس جديد في غضون ستين يوما.
ويقول الجمل إنه ورغم أن الدستور ينص صراحة على إجراء انتخابات في تلك الحالة بين مرشحين من أطراف سياسية مختلفة إلا أن التعديل الذي أدخل على المادة السادسة والسبعين من الدستور المصري في عهد الرئيس مبارك يجعل من شبه المستحيل على أي شخص آخر من غير الحزب الوطني الحاكم المنافسة على منصب الرئاسة.

سوزان مبارك تسآلت عن الهدف من نشر شائعات حول صحة زوجها
ويرى الجمل إن الرئيس مبارك كان بوسعه أن يجنب مصر حالة عدم الوضوح والتشوش التي تعيشها حاليا لو كان استمع إلى نصائح العديد من الخبراء الدستوريين والأطراف السياسية الأخرى التي دعته إلى التنحي والدعوة لانتخابات متعددة الأطراف لاختيار رئيس جديد للبلاد.
وفي توقعاته لما قد يحدث يقول الجمل إن الوضع ربما لا يستند إلى الدستور في حالة رحيل الرئيس بقدر ما قد يستند إلى نفوذ الجماعات ذات المصالح في البلاد إضافة إلى الأجهزة السيادية .
الإخوان يتفقون
ويتفق الدكتور عبد المنعم أبو الفتوح القيادي في جماعة الإخوان المسلمين المصرية والتي ألمحت بعض وسائل الإعلام الرسمية في مصر إلى أنها كانت وراء الشائعة الأخيرة يتفق مع ما يطرحه الدكتور يحيى الجمل ويرى أن مصر تعاني من عدم وجود مؤسسات وان الأمر صار فيها مرتبطا بمصير شخص واحد.
ويتوقع أبو الفتوح أن يتحرك الجيش للسيطرة على مقاليد الأمور في حالة رحيل الرئيس لحين الاخراج القانوني والدستوري للموقف في ظل أوضاع غير ديمقراطية أصلا على حد قوله.
ويقول ابو الفتوح إن الجماعة من جانبها ترحب بسيطرة الجيش على الموقف في حال حدوث ذلك على اعتبار انه مؤسسة وطنية ستضمن استقرار البلاد وتحافظ عليها من الضياع.
ويستبعد ابو الفتوح أن تشهد مصر أية انتخابات حرة لاختيار رئيس قائلا إن مصر تحكم منذ عام اثنين وخمسين بصورة فردية ومن الصعب أن تجرى انتخابات حرة بين يوم وليله لكنه يعرب في نفس الوقت عن عدم رضاه التام عن خيار تدخل الجيش قائلا إن سيطرته على الامور ربما تكون مفيدة لمرحلة انتقالية تواصل بعدها الأطراف السياسية ضغوطها من اجل الوصول إلى انتخابات وديمقراطية حقيقية.
دعوة مغرضه
على أن كرم جبر رئيس مجلس إدارة مؤسسة روز اليوسف الصحفية والمقرب من الحزب الوطني الحاكم لا يتفق مع ما يقوله عبد المنعم أبو الفتوح ويعتقد إن الحديث عن تدخل الجيش هو دعوة مغرضة وخبيثة من قبل جماعة الإخوان المسلمين التي تريد اقتتالا في الشارع المصري.
ويرى كرم جبر إنه من الغباء تصور أن مصر ستتعرض لعدم الاستقرار والفوضى في حال غياب الرئيس مشيرا إلى أن هناك آلية لانتقال السلطة بصورة سلسة في مصر تعمل منذ وقت طويل وقد أثبتت فعاليتها خلال مناسبتين شهدتا توترا حقيقيا في البلاد وليس توترا مفتعلا تفتعله جماعات ذات مصالح الآن كما يقول جبر.
أما المناسبة الأولى وفقا لجبر فقد كانت إبان رحيل الرئيس المصري الأسبق جمال عبد الناصر وعندما كانت مصر تهيئ للحرب لاسترداد أرضها، أما الثانية فقد كانت عندما اغتيل الرئيس الأسبق محمد أنور السادات وعندما كانت مصر في حالة من التوتر الشديد في اعقاب ماعرف باحداث سبتمبر .
وفي كلا المرتين لم تحدث فوضى ولم تتعرض البلاد لحالة من عدم الاستقرار كما يقول جبر الذي يشير إلى أن الشعب المصري يتحد عند الشدائد وأنه من الخطأ تصور ان الناس سيخرجون لاحراق البلاد في حالة رحيل الرئيس مثلا.
ويهاجم جبر الأحزاب والجماعات التي تقول إن الحزب الوطني الحاكم يعمل على إعداد جمال مبارك نجل الرئيس المصري لتولي السلطة من خلال تصعيده لرئاسة الحزب خلال انتخابات الحزب التي تصل ذروتها في نوفمبر القادم.
ويقول جبر إن هذا شأن من شؤون الحزب الوطني ولا حق للآخرين التدخل فيه وأن من حق جمال مبارك ان يرشح لرئاسة الحزب والبلاد أيضا وعلى الأحزاب الأخرى أن تنحو نحو الحزب الوطني بدلا من استمرارها في البكاء على حائطه لسنوات.
وكان السيناريو الذي تحدثت عنه بعض الأطراف المعارضة هو تصعيد جمال مبارك لرئاسة الحزب عندما تصل انتخابات الحزب قمتها في حين يتنحى الرئيس مبارك مفسحا الطريق أمام نجله كي يرشح لانتخابات الرئاسة التي ستجري عام 2011 ضمن مرشحين عده.
ويقول الخبير الدستوري الدكتور يحيى الجمل إنه إذا ماكان هذا السيناريو حقيقيا فإنه سيتعين على الرئيس مبارك ان ينفذه خلال حياته لانه قد لاينفذ بعد رحيله.
غياب الآلية
أما الدكتور سعد الدين ابراهيم عالم الاجتماع السياسي المصري واحد المعارضين الشرسين للرئيس المصري حسني مبارك فيرى أن من حق الناس في مصر ان يبدوا القلق في ظل غياب الية واضحة لتسليم السلطة، ورغم ان الدستور ينص على الية تسليم السلطة واجراء انتخابات إلا ان الدكتور سعد الدين ابراهيم يرى ان المصريين فقدوا ثقتهم باية وثائق مكتوبه.
وعن تصوره لتطور الاحداث في حالة غياب الرئيس يقول سعد الدين إبراهيم إنه وفي ظل غياب أحزاب قوية في مصر فإن البدائل المطروحة هي الجيش وجماعة الاخوان المسلمين.

كثيرون يتكهنون بأنه سيخلف والده
وفيما يتعلق بموقف الاخوان يرى سعد الدين إبراهيم إن الاستقرار من مصلحتهم وأنهم لايرغبون في تغييير دراماتيكي أو هزات غير طبيعية إذ انهم وكما يقول إبراهيم تمكنوا من الحصول على تمثيل معقول داخل البرلمان في عهد مبارك ومن ثم فإنهم ربما يسعون إلى تغيير تدريجي عوضا عن تغيير دراماتيكي وهو مايفسر دعمهم لامكانية تدخل الجيش في حالة غياب الرئيس حفاظا على الاستقرار في البلاد على ان يواصلوا اسلوبهم في الضغط والحصول على المكاسب تدريجيا.
لكن هل يتدخل الجيش ؟يقول سعد الدين ابراهيم إن هناك علامة استفهام امام موقف الجيش ويرى انه من غير الواضح كيف سيكون موقفه لكنه يلفت الانتباه إلى اجراء اتخذه الرئيس مبارك خلال فترة حكمه ويقول إن كثيرين لم ينتبهوا له وهو أنه غير من قانون خدمة الضباط في الجيش المصري بحيث خفض رتبة التقاعد مرتين من لواء إلى عميد في المرة الاولى ومن عميد إلى عقيد في المرة الثانية الا في حالات استثنائيه تعود لتقديره الشخصي.
ويرى سعد الدين ابراهيم إن مبارك كان الرئيس المصري الاول الذي غير في قانون خدمة الضباط وأنه من خلال ذلك كسب ولاء القادة الكبار في الجيش في حين لايبدو واضحا موقف الضباط الاخرين من عقيد إلى مادون ذلك ويرى سعد الدين ابراهيم إن هذه الخطوة كانت لها مدلولاتها الكثيرة سياسيا.
بقي القول إن جميع المراقبين والاطراف السياسية في مصر تجمع على أن اصحاب المصلحة الحقيقية في استمرار الحكم في مصر داخل عائلة الرئيس مبارك هم مجموعة رجال الاعمال والذين راكموا مكاسب خلال فترة حكمه وربما لايطمئنون عليها في حالة خرج الحكم من العائلة.
لكن ولأن رأس المال جبان كما يقال فإن ايا من رجال الاعمال الذين حاولنا التحدث اليهم لم يرد الادلاء برأيه ربما خشية أن يساء تفسير اي كلمة يقولها.
بقي القول أيضا أن هذه ليست جميع الاطراف التي لها رأي في ماقد يحمله المستقبل للحكم بعد مبارك فالاطراف متشعبة وهي خارجية وداخلية لكن ماأسلفناه كان عرضا لأبرز اراء الداخل.

الاثنين، 27 أغسطس، 2007

شوية تهييس مالوش أى لزمه


طلبة زمان و طلبة دلوقتى
” و عايرنا نرجع زى زمان … قول للزمان ارجع يا زمان”
الأغنية دي على طول بتيجى في دماغي كل لما أقارن بين طلبة زمان اللي كان الواحد بيشوفهم في الأفلام و طلبة دلوقتى… مثلا تخيل معايا صوره أبيض و اسود لجامعة القاهرة و القبة الشهيرة… و الطلبة لابسين بدل و طرابيش … و مجموعه من الطلبة بيحاولوا يفضوا خناقه بدون شتايم بين طالب و طالب زميله .. و تلاقى مجموعه ماسكه طالب بيحاول يفلفص منهم و يقولهم سيبونى أنا لازم اعرفه مركزه.. و تلاقى التانيين بيحوشوا الطالب التانى اللى مثلا ممكن يكون مشمر قميصه و مش لابس طربوش و لا جاكيت بدله “دليل أنه روش بقى و كده”
و فجأه يفلت الإتنين من اللى بيحجزوا و يجروا ناحية بعض و تلاقيهم وقفوا فجاه قدام بعض و تلاقى أبو طربوش واقف مكشر و بيقول للتانى الروش ” يا أفندى لازم تعرف إنك غلطان ..اللى عملته ده مايصحش إنت إزاى تولع سيجاره جوه المدرج –طبعا مستحيل كانوا يتخيلوا إن ممكن دلوقتى يولعوا سجاير اثناء المحاضره- و إزاى تقعد طول المحاضره تبصبص لزميلتك .. يا افندى الجامعه مكان للتعليم أولا و اى حاجه ثانيا – طبعا ده كان على ايامهم بس..إنما دلوقتى بقت الجامعه مكان للتعارف و الصحوبيه و اى حاجه غير التعليم… بقى للاسف الطلبه بيروحوا الجامعه علشان يصاحبوا و البنات علشان يتصاحبوا و الكل طبعا ينفض للمحاضرات ماهو اصلا المدرج مليان رغم ان معظم الدفعه بيبقى قاعد فى الجناين … التعليم ده أخر حاجه يفكروا فيها.. و هايتعلموا ايه و اصلا الشغل فى مصر مالوش علاقه باللى بيدرسوه و كمان اتحادات الطلبه مافيش وراها غير الرحلات و الحفلات و المسابقات و بس.. طبعا انا مش اعتراضى على الرحلات و الخفلات لكن اعتراضى الاساسى على كلمة و بس
المهم نرجع لأجدادنا بتوع طلبة زمان و نتخيل الصوره تانى … تلاقى الواد الروش الى مش لابس طربوش ولا جاكيت و مشمر القميص و فاتح أول زرارين بيتكلم بثقه و بيقول لزميله ابو طربوش”و ‘إنت مالك إنت .. أنا حر .. إحنا فى بلد ليبرالى ديمقراطي و من حقي اعمل اللى انا عايزه ولا علشان انا يساري يعنى إنت بتضطهدنى إعتبرنى يا اخى من اليسار الليبرالي” .. يقوم يرد عليه الطالب أبو طربوش بهدوء المره دي و يقوله ” يا زميل يا محترم الاتجاهات السياسية مالهاش علاقه بالقيم اللى المفروض كلنا نحافظ عليها.. حريتك تتوقف عند حرية الأخرين.. و إنت بتأذى الاخرين”… يقوم اللى مشمر قميصه يبص فى الأرض و يعتذر لزميله و يروح يسلم عليه.. فجاه يسمع الجميع طالب جاى بيجرى عليهم و بيقول إلحقوا يا شباب.. وزير المعارف قرر يضيف مصاريف إضافية على الطلبه السنة دي و وزير النقل قرر زيادة المواصلات و كل الطلبه رايحين فى مظاهره سلميه لغاية مكتب الوزير و يقدموله عريضة تطالبه بالعدول عن زيادة المصروفات و بعد كده هاينضم الطلبه للإضراب السلمي اللي عاملينه الناس علشان يقاطعوا المواصلات لغاية ما ينخفض سعرها تانى
طبعا الكلام ده كان زمان و بس.. دلوقتى ولا حد عارف يعنى ايه يمين ولا يسار و لا عارف ايه أهمية السياسة و الأحزاب ولا تهمه البلد أساسا
مش مشكله لو الأسعار زادت أصله مش هو اللى بيدفع و مش مشكله لو الدكتور زود سعر الكتاب و أجبر الطلبه أنهم يشتروه
مش مشكله لو الجامعه ما فيهاش معامل أو أجهزة كمبيوتر… حتى مش مشكله لو الحمامات مكسره و محدش بينضفها… حتى لو الدكتور بيدى دروس و بينجح الطلبه اللى تبعه .. هو ماله أهم حاجه يظبط خروجه تمام بعد مواعيد المحاضرات علشان يكلم البنت اللى عايز يصاحبها قبل ما الواد بتاع سنه تانيه يخطفها منه… و ليه بعد المحاضرات .. ماينفضوا للمحاضرة أساسا و أهو خير البر عاجله… والاحسن و الأشد بقى أنهم يروحوا الحفله اللى عاملها الاتحاد للطلبه الجداد .. أهو ممكن يرقص معاها شويه … و يقولها على الرحله اللى عاملها إتحاد الطلبه علشان يعرف يكلمها لوحدها … أكيد دلوقتى فهمتوا ليه إدارة الجامعه بتكون مصره إن اتحاد الطلبه يكون من الطلبه المواليين اللى بيسمعوا الكلام.. علشان محدش يفكر و علشان كله يبقى فى الطراوه
يا ريت طلبة دلوقتى يبقوا زى طلبة زمان.. مش قصدى على البدل و الطرابيش… لكن قصدى على الإيجابيه و الثقافه و حب البلد و تغيير أى وضع سىء .. يبقى الطلبه عارفين بلدهم فيها ايه .. و يختاروا الصح و يقدروا يحاسبوا الدكاتره و يحسنوا التعليم علشان خاطر التعليم هو التقدم… أكيد طلبة دلوقتى ممكن يكونوا أحسن من طلبة زمان لو قرروا يكون مصيرهم بإيديهم.

وفقا لتوجيهات السيد الحمار


وفقا لبرنامج رئيسنا المحبوب العبقرى و بمناسبة إكتشاف سيادته منذ توليه لشىء لم يكن معروفا فى العالم من قبل يسمى المدن الجديده و الادهى من ذلك و الأمر هو إعتبارها حل جذرى لمشاكل الشباب رغم انها مخصصه للصفوه و رجال الاعمال فقط
يعانى سكان التجمع الثالث و الناس الغلابه بالتجمع الخامس(يعنى اللى ساكنين شقق مش فيلات ) بالقاهره الجديده من عدة مشكلات يستطيع جهاز المدينة حلها بسهوله لو أراد
أول هذه المشكلات هي مشكلة الانقطاع المفاجىء و المتكرر و الغريب لمياه الشرب في هذه الأيام شديدة الحرارة .. حتى بدون أى تنويه اوتحذير قبل قطعها الذى يطول أحيانا لأكثرمن 24 ساعه مع العلم انها لا تنقطع ابدا عن منتجعات الجولف التى تضم الوزراء والسفراء و الحراميه الكبار
ثاني هذه المشكلات هي مشكلة النظافة التي تفاقمت جدا في بعض المناطق (بالتأكيد مناطق المساكن مش الفيلات ) بسبب عدم وجود صناديق القمامة و بالطبع عدم جمعها بواسطة سيارات هيئة تنمية المجتمعات العمرانية …فلجا بعض السكان للإستعانه ببعض العمال لإلقاء القمامة بالصناديق القليله البعيدة جدا أو إلقائها بأنفسهم في صناديق مناطق أخرى أو إلقائها في الشارع و بجوار مداخل العمارات… مع العلم ان سيارات الهيئه تجوب شوارع مناطق الفيلات الفاخره طوال اليوم و يتم كنس الشوارع يوميا فى تلك المناطق
هذا بخلاف سوء حالة التشجير و انعدامه احيانا فى مناطق الشقق و المساكن و اكتست الأشجار و النجيل باللون الأصفر و تحول الكثير منها لبحيرات راكدة و غابات بسبب فتح حنفية المياه بدون وجود مسئول عن الري المنظم
مع العلم بأن اى مشترى للوحدات السكنية يقوم بدفع رسوم اشتراك شهريه للنظافة و المياه و الخدمات بخلاف دفعات الصيانة (3000 جنيه ) التي لم نرى لها اى جدوى في ظل سوء حالات العمارات من الداخل
ومع العلم بأن جهاز المدينه اصبح يبيع تلك الشقق بالمزايدات و بأسعار عاليه الان بعد اشتهار تلك المناطق
إن الكثير من السكان يخافون إن تتحول تلك المساكن الجميلة التي هربوا إليها من فوضى العشوائيات و الزحام إلى عشوائيا أخرى لكن ببعض الشياكه .. خصوصا مع أزمة المواصلات التي طرأت حديثا بعض منع سائقي الميكروباصات من العمل داخل المدينة و استبدالهم بشركات النقل الجماعي الفاشلة المستغلة التي تؤخرالسكان المضطرون الذين لا يملكون سيارات عن الذهاب لأعمالهم صباحا و تستغل عدم وجود بديل غيرهم سواء حكومي أو خاص بجانب سوء الخدمة و تكدس الركاب بسبب قلة سيارات تلك الشركات على هذا الخط الذي يزداد عدد مستخدميه يوميا
بالرغم من ان سكان مساكن الشباب أو الإسكان الاستثماري بالتجمع الثالث و الخامس في ازدياد مستمر و لا تزال الخدمات و المواصلات و المرافق كما هي ..
فهل هذا من ضمن البرنامج العبقرى للرئيس مبارك ام ان القاهره الجديده ستضاف للمناطق العطشى التى كثرت فى عهده بصوره لا مثيل لها فى التاريخ ..حتى فى احلك ايام الجفاف

عنوان كئيب لشخص كئيب و مكتئب


عنوان كئيب لشخص كئيب و مكتئب
من فتره كبيره كنت بفكر اعمل مدونه .. و كان فيه اكتر من اسم فى دماغى
لكن المشكله انى كانت بتجيلى كل شويه موجات متتابعه من الإحباط رغم انى من الناس اللى تحس انهم مكبرين دماغهم و مش فى دماغهم اى حاجه
لكن بجد زهقت
زهقت من النظام ده و الشعب ده و المعارضه دى
نظام غبى قذر عمره ما هايسمح بأى تغيير أو إصلاح حتى لو امريكا ضغطت عليه او مثلت انها بتضغط عليه
و شعب جبان سلبى جاهل عمره ما هيساعد فى أى تغيير ولا هايقبله و لا عمره اساسا ممكن يتخيله … دا حتى شعب بيترعب لو اتخيل ان مبارك ممكن يموت
و معارضه ارجوزات … شوية مثقفين على شوية افاقين على شوية مرتزقه .. كل اللى فالحين فيه التنظير على بعض و الرغى و الكلام الفارغ و المعارك الوهميه و خصوصا مع بعضهم … ده غير طبعا الظهور فى الفضائيات و حب الزعامه الوهميه .. لا حاسين بشعب و لا الشعب ناوى يحس بيهم
ولا عمرهم ما هيتحدوا ولا عمرهم ما هايغيروا بنفس افكار السبعينات
دا حتى شباب المعارضه اللى كان كلهم حماس .. اتوسخوا من الكبار و بقى كل نشاطهم هو القعاد على القهاوى و الكلام عن مين صاحب مبن و مين نام مع مين … او ازاى نسيطر و نمنع التيار الفلانى و نحرج التيار العلانى
طب هاتسألنى و تقول ايه اللى طققها فى دماغك كده و خلاك تعمل مدون … هى ناقصه مدوننين ؟؟ .. مانت عارف ان كل المناضلين بتوع زمان بقوا مناضلين على النت … و كاه بيكتب بلازمه او من غير لازمه
هاقولك هى جت عليا
اعتبره اى كلام من الكلام اللى بنسمعه و بنقراه
يمكن تلاقى فيه حاجه مختلفه
و يمكن احباطى يقل شويه
و يمكن يزيد
ghosty
ماهرى حتى النخاع